Thursday, May 11, 2023

ವಿಧಾನಸಭಾ ಚುನಾವಣೆ : ಕಳೆದ ಬಾರಿಗಿಂತ ಕಡಿಮೆ ಮತದಾನ, ಫಲ ನೀಡದ ಜಾಗೃತಿ

೭೫,೭೧೫ ಪುರುಷ, ೭೮,೧೪೮ ಮಹಿಳಾ 

ಒಟ್ಟು ೧,೫೩,೯೦೦ ಮತದಾರರು ಹಕ್ಕು ಚಲಾವಣೆ

ಭದ್ರಾವತಿ ತಾಲೂಕಿನ ಕೂಡ್ಲಿಗೆರೆ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಗೌರಮ್ಮ ಎಸ್. ಮಹಾದೇವರವರು ಅಧ್ಯಕ್ಷರಾದ ನಂತರ ಮೊದಲ ಬಾರಿಗೆ ವಿಧಾನಸಭಾ ಚುನಾವಣೆಯಲ್ಲಿ ತಮ್ಮ ಹಕ್ಕು ಚಲಾಯಿಸಿದರು.
    ಭದ್ರಾವತಿ, ಮೇ. ೧೧ : ಈ ಬಾರಿ ವಿಧಾನಸಭಾ ಚುನಾವಣೆಯಲ್ಲಿ ಕ್ಷೇತ್ರದ ಒಟ್ಟು ೨,೧೨,೧೬೫ ಮತದಾರರಲ್ಲಿ ೧,೫೩,೯೦೦ ಮತದಾರರು ತಮ್ಮ ಹಕ್ಕು ಚಲಾಯಿಸಿದ್ದು,  ಒಟ್ಟಾರೆ ೭೨.೫೪ರಷ್ಟು ಮತದಾನವಾಗಿದೆ.
    ೧,೦೩,೧೯೮ ಪುರುಷ ಮತದಾರರ ಪೈಕಿ ೭೫,೭೧೫ ಮಂದಿ ಶೇ.೭೩.೩೭ರಷ್ಟು ಮತ್ತು ೧,೦೮,೯೬೨ ಮಹಿಳಾ ಮತದಾರರ ಪೈಕಿ ೭೮,೧೮೪ ಮಂದಿ ಶೇ.೭೧.೭೫ರಷ್ಟು ಹಾಗು ಇತರೆ ೧ ಸೇರಿ ಒಟ್ಟು ೧,೫೩,೯೦೦ ಮಂದಿ ಶೇ.೭೨.೫೪ರಷ್ಟು ಮತದಾರರು ತಮ್ಮ ಹಕ್ಕು ಚಲಾಯಿಸಿದ್ದಾರೆ. ಮತದಾನದಲ್ಲಿ ಪುರುಷ ಮತದಾರರು ಮೇಲುಗೈ ಸಾಧಿಸಿದ್ದಾರೆ.
    ಕಳೆದ ಬಾರಿಗಿಂತ ಕಡಿಮೆ ಮತದಾನ :
    ಕಳೆದ ಬಾರಿಗಿಂತ ಈ ಬಾರಿ ಕಡಿಮೆ ಮತದಾನವಾಗಿದ್ದು, ೨೦೧೮ರಲ್ಲಿ  ಚುನಾವಣೆಯಲ್ಲಿ ೭೩.೫೯ರಷ್ಟು ಮತದಾನ ನಡೆದಿದ್ದು, ಈ ಬಾರಿ ೭೨.೫೪ರಷ್ಟು ಕಡಿಮೆ ಮತದಾನ ನಡೆದಿದೆ.  
ಈ ಹಿಂದಿನ ೪ ಚುನಾವಣೆಗಳು ಹಾಗು ಪ್ರಸ್ತುತ ಚುನಾವಣೆ ಸೇರಿದಂತೆ ಒಟ್ಟು ೫ ಚುನಾವಣೆಗಳಲ್ಲಿ ಮತದಾನದ ಪ್ರಮಾಣ ಶೇ.೭೫ರ ಗುರಿ ತಲುಪಿಲ್ಲ. ಈ ಬಾರಿ ಹೆಚ್ಚಿನ ಗುರಿ ಸಾಧಿಸುವ ನಿಟ್ಟಿನಲ್ಲಿ ಚುನಾವಣಾ ಆಯೋಗ ಹೆಚ್ಚಿನ ಗಮನ ಹರಿಸಿತ್ತು. ಕಳೆದ ಕೆಲವು ತಿಂಗಳಿನಿಂದ ನಿರಂತರವಾಗಿ ವಿವಿಧ ಕಾರ್ಯಕ್ರಮಗಳ ಆಯೋಜನೆ ಮೂಲಕ ಮತದಾನ ಜಾಗೃತಿ ಮೂಡಿಸಿತ್ತು. ಆದರೆ ನಿರೀಕ್ಷೆಯಂತೆ ಹೆಚ್ಚಿನ ಗುರಿ ತಲುಪಿಲ್ಲ.
    ಕೂಡ್ಲಿಗೆರೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಶೇ.೭೯.೫೯ರಷ್ಟು ಮತದಾನ :
    ತಾಲೂಕಿನ ಕೂಡ್ಲಿಗೆರೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ೫ ಮತಗಟ್ಟೆಗಳ ಒಟ್ಟು ೩,೮೯೬ ಮತದಾರರ ಪೈಕಿ ೩೧೦೧ ಮತದಾರರು ಒಟ್ಟು ಶೇ.೭೯.೫೯ರಷ್ಟು ಮತದಾನವಾಗಿದೆ ಎನ್ನಲಾಗಿದೆ.
    ಕೂಡ್ಲಿಗೆರೆ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಗೌರಮ್ಮ ಎಸ್. ಮಹಾದೇವರವರು ಅಧ್ಯಕ್ಷರಾದ ನಂತರ ಮೊದಲ ಬಾರಿಗೆ ವಿಧಾನಸಭಾ ಚುನಾವಣೆಯಲ್ಲಿ ತಮ್ಮ ಹಕ್ಕು ಚಲಾಯಿಸಿದರು.

No comments:

Post a Comment